Миний тухай

Боловсрол, мэргэжлийн сургалт

• Сэтгэл судлалын магистр (MSc) — Нортумбриагийн их сургууль, Их Британи (Британийн Сэтгэл Судлалын Нийгэмлэгийн (BPS) магадлан итгэмжлэлтэй хөтөлбөр)
• Утга зохиол, бага насны хүүхдийн боловсролын бакалавр (BA) — Бирмингемийн их сургууль, Их Британи
• Танин мэдэхүй, зан үйлийн сэтгэл заслын (CBT) сургалт — Бекийн Танин мэдэхүй, зан үйлийн сэтгэл заслын хүрээлэн (Beck Institute)
• Сэтгэл гутрал, сэтгэл түгших эмгэгийн үеийн CBT-ийн ахисан түвшний сургалт — Бекийн Танин мэдэхүй, зан үйлийн сэтгэл заслын хүрээлэн (Beck Institute)
• QPR (Асуух, ятгах, холбон зуучлах) сургалт — Амиа хорлох эрсдэлтэй хүнийг таньж, шаардлагатай тусламжид холбон зуучлах чиглэлээр
• Хямралын үеийн тусламж, дэмжлэг үзүүлэх мэргэжлийн сургалт (Crisis Specialist Training)
• Британийн Сэтгэл Судлалын Нийгэмлэгийн (BPS) гишүүн — Гишүүнчлэлийн дугаар: 833418

Ажлын туршлага

Би боловсролын салбарт 10 гаруй жил ажиллахдаа өсвөр насныхан ба залуусын өсөж төлөвших үйл явц, тэдний сэтгэл хөдлөл, өөртөө итгэх итгэл, бусадтай харилцах харилцаа хэрхэн өөрчлөгдөж, хөгждөгийг ойроос ажиглаж ирсэн. Энэ хугацаанд өсвөр насныхан болон залуучууд тус бүр өөрийн гэсэн онцлог, дотоод ертөнцтэй бөгөөд гаднаас нь тэр бүр анзаарагддаггүй айдас, эргэлзээ, сэтгэл санааны бэрхшээлтэй тулгардаг гэдгийг илүү гүнзгий ойлгосон.

Хүүхэд, залуустай ажилласан эдгээр жилүүд хүний сэтгэл зүйг илүү гүнзгий таньж мэдэх хүсэл сонирхлыг минь төрүүлсэн юм. Хүмүүс өөрсдийн бодол, мэдрэмжийг хэрхэн ойлгож, сэтгэл хөдлөлөө яаж зохицуулдаг, мөн амьдралын хүнд хэцүү үе, өөрчлөлт, сорилтуудыг хэрхэн даван туулдаг тухай илүү ихийг мэдэхийг хүссэн нь намайг сэтгэл судлалын чиглэлээр суралцахад хүргэсэн.

Сэтгэл судлалын магистрын хөтөлбөрт суралцах хугацаандаа би сэтгэл зүйн хямралын үед тусламж, дэмжлэг үзүүлэх чиглэлээр мэргэжлийн сургалтад хамрагдсан. Үүний дараа Токио хотод үйл ажиллагаа явуулдаг англи хэлний тусламжийн газар үйлчилгээнд хоёр жилийн турш зөвлөгчөөр ажилласан. Тэнд ажиллахдаа сэтгэл санааны хүнд үеийг туулж буй, ганцаардал, харилцааны хүндрэл, хувийн амьдралын асуудал болон сэтгэл зүйн хямралтай нүүр тулсан хүмүүсийг сонсож, шаардлагатай үед нь сэтгэл санааны дэмжлэг үзүүлж байсан.

Эдгээр туршлага надад хүн бүрийн туулж буй бэрхшээл өөр боловч өөрийг нь анхааралтай сонсож, ойлгох хүнтэй байх нь ямар үнэ цэнтэйг улам тодорхой мэдрүүлсэн. Заримдаа хүнд өөрийн мэдрэмжийг үгээр илэрхийлэх, бодол санаагаа цэгцлэх, тулгарсан асуудлаа өөр өнцгөөс харах боломж л хамгийн түрүүнд хэрэгтэй байдаг.

Өдгөө би өсвөр насныхан, залуус болон насанд хүрэгчидтэй ажиллаж, сэтгэл түгших, сэтгэл санаагаар унах, стресс, өөртөө итгэх итгэл, харилцааны хүндрэл, амьдралын өөрчлөлт зэрэг асуудлаар сэтгэл зүйн зөвлөгөө өгч байна. Миний хувьд зөвлөгөөний хамгийн чухал суурь нь хүн өөрийн бодол, мэдрэмжээ шүүмжлүүлэхээс эмээлгүй хуваалцаж, өөрийгөө илүү сайн ойлгох боломжтой, итгэлцэлд тулгуурласан орчныг бүрдүүлэх явдал юм.

Зөвлөгөө өгөх чиглэлүүд

Би дараах асуудлуудаар сэтгэл зүйн зөвлөгөө, дэмжлэг үзүүлдэг.

• Сэтгэл түгших, стресс
• Сэтгэл гутрал, сэтгэл санаагаар унах
• Ажлын ачаалал, сэтгэл зүйн туйлдал
• Өөрийгөө үнэлэх үнэлэмж, өөртөө итгэх итгэл
• Сэтгэл хөдлөлөө ойлгож, зохицуулах
• Хосын, гэр бүлийн болон бусад харилцааны хүндрэл
• Өөрийгөө таньж мэдэх, хувь хүний хөгжил
• Амьдралын өөрчлөлт, шинэ орчинд дасан зохицох
• Хагацал, уй гашуу
• Төрсний дараах сэтгэл зүйн хүндрэл

Миний ажиллах арга барил

Би сэтгэл зүйн зөвлөгөө өгөхдөө танин мэдэхүй, зан үйлийн сэтгэл засал (CBT), хүн төвтэй сэтгэл засал (Person-Centred Therapy), экзистенциал сэтгэл засал (Existential Therapy) зэрэг арга барилыг тухайн хүний хэрэгцээ, нөхцөл байдалд тохируулан хослуулж ашигладаг.

Хүн бүрийн амьдралын туршлага, үзэл бодол, тулгарч буй асуудал өөр учраас бүгдэд ижил арга барил тохирно гэж үздэггүй. Тиймээс бид таны хувьд юу чухал болох, ямар хүндрэл тулгарч байгаа, юуг өөрчлөхийг хүсэж байгааг хамтдаа ойлгож, зөвлөгөөний зорилгоо тодорхойлно.

Зарим үед сэтгэл түгшээж буй бодлоо таньж, өөр өнцгөөс харах, стресс болон сэтгэл хөдлөлөө зохицуулах арга барилд суралцахад анхаардаг. Харин зарим үед өөрийн мэдрэмж, харилцаа, амьдралын сонголт, үнэт зүйлсээ илүү гүнзгий ойлгох нь чухал байдаг.

Миний хувьд сэтгэл зүйн зөвлөгөө нь зөвхөн тулгарсан асуудлаа шийдвэрлэх бус, өөрийгөө илүү сайн ойлгож, амьдралын сорилтуудыг даван туулах чадвараа бэхжүүлэх боломж юм.

Миний зорилго бол таныг шүүмжлэлгүйгээр сонсож, өөрийн бодол, мэдрэмжээ нээлттэй хуваалцах аюулгүй орчныг бүрдүүлэх явдал юм. Бид хамтдаа танд юу хэрэгтэй байгааг ойлгож, өөрт тань тохирох арга замыг эрэлхийлнэ.