Билгүүн Харрис нь Токио хотод ажилладаг зөвлөх сэтгэл зүйч бөгөөд сэтгэл түгшүүр, сэтгэл гутрал, ажлын болон амьдралын туйлдалт (burnout), мөн эх орноосоо хол амьдрахтай холбоотой сэтгэлзүйн бэрхшээлтэй тулгарч буй насанд хүрэгчидтэй ажилладаг.

Тэрээр Нортумбриягийн Их Сургууль (Британийн Сэтгэл Зүйчдийн Нийгэмлэгийн магадлан итгэмжлэлтэй)-ийг Сэтгэл судлалын магистрын зэрэгтэй төгссөн бөгөөд Британийн Сэтгэл Зүйчдийн Нийгэмлэг (BPS)-ийн гишүүн юм. Мэргэжлийн сургалтынхаа хүрээнд Бек Институт-д Танин мэдэхүйн зан үйлийн сэтгэл заслын (CBT) сургалтуудыг дүүргэж, сэтгэл түгшүүр болон сэтгэл гутралын чиглэлээр мэргэшсэн.

Мөн магистрын зэрэг хамгаалах хугацаандаа хямралын зөвлөхөөр бэлтгэгдэж, Токио дахь англи хэлээр үйлчилгээ үзүүлдэг сэтгэлзүйн хямралын утасны төвд хоёр жилийн турш ажилласан. Энэ туршлага нь хүмүүсийн амьдралын хамгийн эмзэг, хүнд мөчүүдэд тэднийг тайван сонсож, аюулгүй, итгэлтэй орчин бүрдүүлэх ур чадварыг нь улам бэхжүүлсэн.

Монгол, Япон, Англид амьдарч байсан туршлагатай тул гадаадад амьдрах, танихгүй орчинд шинээр эхлэх үед төрдөг ганцаардал, дасан зохицох бэрхшээл, өөрийгөө дахин олохтой холбоотой гүн мэдрэмжүүдийг тэр зөвхөн мэргэжлийн түвшинд бус, өөрийн биеэр ч туулж ирсэн учир сайн ойлгодог.

Түүний ажиллах арга барил нь интегратив бөгөөд Танин мэдэхүйн зан үйлийн сэтгэл засал (CBT), Хүн төвт сэтгэл засал (Person-Centered Therapy), Оршихуйн сэтгэл заслын (Existential Therapy) хандлагыг үйлчлүүлэгч бүрийн хэрэгцээ, нөхцөл байдалд нийцүүлэн уялдуулан ашигладаг.

Зөвлөгөөг дэлхийн хаанаас ч цахимаар авах боломжтой.