Насанд хүрэгчдэд зориулсан сэтгэл зүйн зөвлөгөө
Амьдралд бүх зүйл нэгэн зэрэг давхацсан мэт санагдах үе бий. Ажил, гэр бүл, харилцаа, мөнгө санхүүгийн асуудлаа зохицуулах гэж хичээх зуур өөрийн сэтгэл санаанд анхаарах завгүй өнгөрөх нь ч бий. Заримдаа байнга ядарч, амархан бухимдаж, өчүүхэн зүйлд хүртэл санаа зовдог болсон хэрнээ яг юунаас болж байгаагаа ойлгоход хэцүү байдаг.
Хайртай хүнээ алдах, дотнын хүнээсээ хагацах, салалт, ажлаа алдах, өөр улс руу нүүх зэрэг амьдралын томоохон өөрчлөлтүүдийн дараа өмнөх шигээ байж чадахгүй мэт санагдаж болно. Зарим өөрчлөлт өөрийн хүссэн, удаан хүлээсэн зүйл байсан ч дасахад амаргүй байдаг.
Заримдаа тодорхой шалтгаангүйгээр сэтгэлээр унах, байнга түгших, нойр хулжих, өмнө нь дуртай байсан зүйлсээсээ таашаал авахаа болих үе бий. Гаднаас нь харахад ажил, амьдралаа хэвийн үргэлжлүүлж байгаа ч дотроо ихэд шаналж, бүхнийг ганцаараа даван туулах гэж хичээж байж болно.
Насанд хүрэгчид ямар асуудлаар зөвлөгөө авдаг вэ?
- Сэтгэл түгших, байнга санаа зовох: Ажил, гэр бүл, эрүүл мэнд, ирээдүйн талаар хэт их санаа зовох, тайвширч чадахгүй байх, хамгийн муугаар төсөөлөх
- Сэтгэлээр унах, сэтгэл гутралын шинж тэмдэг: Удаан хугацаанд гуниглах, юу ч хийх хүсэлгүй болох, өмнө нь дуртай байсан зүйлсдээ сонирхолгүй болох, ирээдүйд итгэх итгэлээ алдах
- Удаан үргэлжилсэн стресс, ажлын ядаргаа: Ажлын ачаалал, хариуцлагаас болж ядарч туйлдах, амарч чадахгүй байх, ажилдаа сонирхолгүй болох
- Уй гашуу, хагацал: Хайртай хүнээ алдах, салалт, дотнын харилцаа тасрах зэрэгтэй холбоотой гуниг, ганцаардал, хоосролыг даван туулахад хүндрэлтэй байх
- Хосын болон гэр бүлийн харилцааны асуудал: Хань ижилтэйгээ үл ойлголцох, байнга маргалдах, гомдол хуримтлагдах, харилцаандаа ганцаардах
- Өөртөө итгэлгүй байх, хил хязгаар тогтоох: Өөрийн үнэ цэнэд эргэлзэх, өөртөө хэт өндөр шаардлага тавих, бусдад үгүй гэж хэлж чадахгүй байх, бусдын хэрэгцээг өөрийнхөөсөө үргэлж дээгүүр тавих
- Амьдралын томоохон өөрчлөлт: Шинэ ажилд орох, ажлаа алдах, гэрлэх, салах, эцэг эх болох, өөр улс руу нүүх зэрэг өөрчлөлтөд дасахад хүндрэлтэй байх
- Ганцаардал, бусдаас хөндийрөх: Ойр дотнын хүмүүстэй байсан ч ганцаардах, өөрийн мэдрэмжээ хуваалцах хүнгүй мэт санагдах
- Сэтгэл хөдлөл, өнгөрсөн үеийн хүнд дурсамж: Амархан уурлах, бухимдах, сэтгэл хөдлөлдөө автах, өмнө нь туулсан хэцүү үйл явдал одоогийн сэтгэл санаа, харилцаанд нөлөөлөх
- Амьдралын утга учир, хүсэл зорилгын эргэлзээ: Амьдрал гаднаас нь харахад хэвийн боловч дотроо сэтгэл хангалуун бус байх, цаашдаа юу хүсэж байгаагаа мэдэхгүй байх